Itsinda ry’abadepite 3 baturutse mu nteko Ishingamategeko y’Umuryango wa Afurika y’Iburasirazuba(EALA) basuye Komisiyo y’Igihugu y’Amatora. Abo badepite ni Hon. Akhaabi Gervase uturuka muri Kenya, Hon. Bizimana Francois uturuka i Burundi na Hon. Nyirahabineza Valérie wagiye muri EALA aturutse mu Rwanda. NK’uko byatangajwe n’uwari uyoboye iryo tsinda Hon. Akhaabi Gervase, ngo baje muri Komisiyo y’Igihugu y’Amatora kureba ko amwe mu mahame agenga umuryango w’Ibihugu by’Afurika y’Iburasirazuba(EAC) yubahirizwa.

Hibanzwe ku ngingo ya 6 y’amasezerano agenga EAC agace (d) kavuga ko ibihugu bigize EAC bigomba guteza imbere imiyoborere myiza ishingiye kuri demokarasi, kubahiriza amategeko, gukorera mu mucyo no kumurika ibyo ukorera abaturage, ubutabera, amahirwe angana mu nzego zose, uburinganire bw’umugabo n’umugore n’uburenganzira bwa muntu.

Bwana Munyaneza Charles, umunyamabanga Nshingwabikorwa wa Komisiyo y’Igihugu y’Amatora yabasobanuriye amavu n’amavuko ya Komisiyo y’Igihugu y’Amatora, uko iteye, ibyo imaze kugeraho, icyerekezo cyayo ndetse abereka ko yubahiriza ariya mahame avugwa mu ngingo ya 6 y’amasezerano agenga EAC.

Bwana Munyaneza Charles yasabye ko ubufatanye bw’inzego ziyobora amatora muri EAC bwarenga koherezanya indorerezi mu gihe cy’amatora gusa ahubwo zigafatanya no mu zindi nzego. Yagize ati “Ni kuki twakoresha amafaranga menshi tugura bimwe mu bikoresho by’amatora kandi dushobora kubitira muri bagenzi bacu bashinzwe amatora muri EAC? Kuki bagenzi bacu bashinzwe amatora muri EAC bajya kwandikisha impapuro z’amatora i Burayi n’ahandi mu bihugu byo hanze ku buryo bubahenze kandi hano muri Komisiyo y’Igihugu y’Amatora mu Rwanda dufite icapiro rizikora? Ni kuki inzego zishinzwe amatora zitajya zitizanya impuguke ku mirimo itandukanye y’amatora?” Yanashimangiye icyifuzo cy’uko amahame amwe agenga imiyoborere y’amatora mu bihugu bigize EAC yakorwa ku buryo bumwe.

Bwana Munyaneza Charles yanatanze igitekerezo ku mpamvu zituma akenshi amatora aba muri byinshi mu bihugu byo muri Afurika atagenda neza. Yavuze ko impamvu ya mbere ari inzego ziyobora amatora muri ibyo bihugu zigenzurwa n’abanyamahanga. Yatanze urugero rw’aho bimwe mu bihugu byiyambaza abahanga mu matora b’abanyamahanga. Impamvu ya kabiri yavuze ko ijyanye n’uko usanga abo banyamahanga ari nabo batanga amafaranga hafi ya yose akoreshwa muri ayo matora. Ibi ngo nibyo bituma bategeka ibyo bashaka bagendeye ku mafaranga yabo baba batanze. Impamvu ya gatatu ngo hari ubwo usanga abayobora amatora muri bimwe mu bihugu nabo badashyize hamwe cyangwa batumva kimwe ibyo bakora. Yavuze ko ibi byose bituma Abanyafurika benshi batagira amatora ayabo ibyo bikagenda bigira ingaruka mbi kuri ibyo bihugu n’abaturage babyo.

Hon. Akhaabi Gervase yifuje kumenya niba mu matora y’u Rwanda hatabamo ruswa. Bwana Munyaneza Charles yamushubije ko mu myaka 11 amaze akorera urwego ruyobora amatora atarabona abatanga ruswa igamije kugura amajwi. Yagize ati “mu bindi bihugu hari ubwo umuntu ufite amafaranga ashobora gutanga ruswa cyangwa akagura amajwi. Mu Rwanda ho nta bihari kuko uwo muco wa politiki udahari ndetse mu mategeko n’amabwiriza bigenga amatora harimo ingingo zikumira bene uwo muco mubi”

Hon. Akhaabi kandi yibajije niba ubwitabire(voter turn up) buba buri hejuru mu Rwanda kubera ko abantu bahatirwa kuza gutora. Bwana Munyaneza Charles yavuze ko ibyo atari byo ahubwo amusobanurira impamvu ubwo bwitabire buhora buri hejuru. Imwe muri izo nk’uko Munyaneza Charles yabivuze, ni uko mbere y’amatora habaho inyigisho z’uburere mboneragihugu n’ubukangurambaga maze abaturage bakabanza kwigishwa bihagije. Indi mpamvu ngo n’uko uwo abaturage batoye ariwe utsinda ibyo bikabaha icyizere cyo kwitabira amatora n’ibyavuyemo. Indi mpamvu ngo ni uko abanyarwanda bari bamaze igihe kirekire baravukijwe uburenganzira bwo gutora bityo aho babuboneye bakumva bagomba kubukoresha bitabira amatora kugira ngo bishyirireho ubuyobozi.

Aba badepite barangije uruzinduko rwabo muri Komisiyo y’Igihugu y’Amatora bashima ibisobanuro bahawe ndetse bishimira urwego rushimishije Komisiyo y’Amatora mu Rwanda imaze kugeraho mu gushimangira no guteza imbere amahame ya Demokarasi n’Imiyoborere myiza binyuze mu matora.