Amatora arategurwa

Bamwe mu mubitabiriye inama nyunguranabitekerezo ku matora

Tariki ya 09 Ugushyingo 2009, mu Nteko ishinga amategeko habereye inama nyunguranabitekerezo ku amatora. Ni inama yateguwe na AMANI Rwanda mu rwego rwo gutoza Abanyarwanda  amatora akozwe mu mutuzo.

Iyo nama yari yatumiwemo izengo zitandukanye zirimo abagize Inteko ishinga amategeko, Imitwe yombi, Abakomiseri muri Komisiyo y’Igihugu y’Amatora, Abahagarariye imitwe ya Politike, Abahagarariye Inzego z’Abagore n’iz’Urubyiruko, Abayobozi b’Uturere, Abahagarariye Imiryango itegamiye kuri Leta, Abahagarariye abanyamakuru, Abahagarariye Imiryango iharanira uburenganzira bwa Muntu n’Abahagarariye amadini.

Mu biganiro byatanzwe muri iyo nama birimo: Isano ya Demokarasi n’amatora, Isano y’uburere n’umuco wa Demokarasi, Amateka ya Demokarasi n’amatora mu Rwanda, Uruhare rw’Abaturage mu matora, Uruhare rw’Imitwe ya Politike mu matora, uruhare rw’Itangazamakuru mu matora, Uruhare rw’Imiryango itegamiye kuri Leta mu matora, Umutekano mu matora, Amategeko n’amahame agenga amatora mu Rwanda, Imyitwarire y’Umuyobozi mwiza, byose byagarukaga ku cyatuma amatora ategurwa neza, akitabirwa kandi n’ibiyavuyemo bikagira agaciro.  

Bamwe mu batanze ibiganiro mu nama nyunguranabitekerezo ku matora

By’umwihariko, Umunyamabanga Nshingwabikorwa wa Komisiyo y’Igihugu y’Amatora, Bwana MUNYANEZA Charles yagejeje kubitabiriye inama ikiganiro kivuga k’ ” Ukwitabira matora n’uruhare rwa buri wese mu migendekere myiza yayo”( Participation in the Electoral Process) .

Muri icyo kiganiro yasobanuye “Electoral Process” icyo ari cyo, agaruka ku byiciro bigize amatora n’uburyo bikurikirana, yarekana ko mu Rwanda, muri iki gihe turi mu cyiciro kibanziriza amatora nyirizina ya Perezida wa Repubulika (Pre-elections). Komisiyo y’Igihugu y’Amatora ikaba iri mu myiteguro yayo kandi iyo myiteguro ikaba igenda neza.

Yakomeje agaragaza abafatanyabikorwa bagira uruhare mu myiteguro y’amatora mu Rwanda, asaba ko buri wese agomba kugaragaza uruhare rwe kugira ngo amatora twitegura ya Perezida wa Repubulika azagende neza, arangiza ikiganiro yerekana ko, uko amatora yitabiriwe n’inzego zose ari ko yemerwa, akagira agaciro n’ireme.